Curaçao, Neth. AntillesMitar siboyo, Mayonès, lamunchi, kròpsla, peper, salu tur na smak. Mitar bleki chikí di maishi hinté, blachi lourel, pikalili, Mitar apel bèrdè, tomati pa dòrna. 2 awakati Mei liber kabaron 2 batata 3 webu 2 pida sèlder merikano
Pone e kabaron herebé den nan kaska, den poko awa ku salu, un tiki peper i e blachinan di lourel. Despues ku e kabaronnan a herebé kompletamente ta saka esakinan for di den nan kaska i ta kòrta nan den lomba, pa asina saka tur e sushi for di den e lomba. Despues ta kòrta e kabaronnan na pida pida di mas o menos 1 pa 1 sèntimeter i mei, pero no demasiado grandi. Despues ku a pone e batatanan herebé den nan kaska, ta kaska esakinan i kòrta na dou dou. Ora kaba kòrta nan ta meskla esakinan ku e kabaron i tambe e sèlder merikano ku mester kòrta mas chikí posibel, of tambe por hink’é den un food processor.
Agregá tambe e apel na dou dou, siboyo, maishi, i demas spesereinan i tambe mas o menos tres kuchara di mayonès. Despues ku kaba meskla tur kos huntu i e salada ta klá, ta pone esaki fria den frishidèl.
E buki di reseta aki “Barika yen Kurason Kontentu” di Ramon Yung ta obtenibel na diferente libreria na Korsou..
|